Plurk

Maliban sa pagiging aktibo ko dati sa blogging, nawili din ako sa micro blogging na tinatawag na plurk. Iba sya sa twitter.. Mas masaya, mas maliit ang mundo, pero mas magulo din. Dito ko lubusang nakilala ang mga iniidolo ko noon sa blogging at naging maliit din ang mundo naming lahat. Nagsimula sa pag-aadd lang ng kung sino-sino, hanggang sa merong namuong pagkakaibigan. Syempre, kung merong pagkakaibigan, meron ding hindi pagkakamabutihan, at syempre, pag-iibigan. Dito ko nakilala ang iba't ibang klase ng tao na hindi ko nakilala sa labas ng internet. Iba-iba sila, merong plastik, merong nagmamatapang, merong chismosa, palaaway, duwag, tanga, nagmamagaling, nagpapasikat, nympho, bakla, tibo, scammer, drama queen, madaldal, palakaibigan, sinungaling, negosyante, lahat-lahat!

Ibang-iba ang mundo sa labas kesa sa mundo sa plurk. Dito nag-iiba ang personality ng mga taong, kung sa totoong buhay pala eh walang mapatunayan sa sarili kaya pilit ipinagsisiksikan ang sarili at umaasang kahit man lang sa internet at sa grupong kinabibilangan nya eh magkaroon sya ng pangalan kahit papaano. Kunsabagay, kung bobo ka nga naman sa totoong buhay, pwede kang magkunwaring matalino sa plurk, magcopy paste ng mga sinasabi ng iba na tama ang grammar, maglagay ng ibang profile pic kung saan ang picture mo eh niphotoshop o kaya naman eh ibang tao talaga ang nasa picture na yon, mang-away ng ibang plurkers kasi natatangahan ka pero sa totoong buhay pala eh ikaw ang madalas inaapi at inaaway ng kung sino-sino. Kahit anong image ang i-pakita mo, pwedeng-pwede!

Pero ang totoo nyan, pagkatapos makipagbatuhan ng maiinit na parinigan, chismis, plastikan na batian, at totoong pakikipag-usap, sa isang iglap ay babalik at babalik ka rin sa totoong mundo. Totoong mundo na haharapin mo pagkatapos mong isara ang browser mo at i-off ang computer mo. Dito sa mundo kung saan walang block, ignore, at mute button na aasahan mong i-click kapag nabubwisit ka na sa taong nagsasalita sa tabi mo. Ito ang totoong mundo, ito ang realidad na mas dapat mong pagbigyan ng pansin. Hindi ibig sabihin na wala kang nagawang pangalan sa loob ng iternet eh loser ka na..

Nakakalungkot lang din isipin na ang pagkakaibigang nabuo sa loob ng plurk ay duon din matatapos. Bandang huli, eto lang ang napatunayan ko.. sa kulang-kulang 30 tao na nakasalamuha ko duon mula pa sa pinakauna kong account hanggang sa huli, 4 hanggang 5 lang ang masasabi kong naging totoo sa akin.